Friday, January 8, 2010

എല്‍.ഇ.ഡി വിളക്ക്

വീട്ടാവശ്യത്തിനായി ഒരു എല്‍.ഇ.ഡി വിളക്ക് നിര്‍മ്മിക്കാന്‍ ശ്രമിച്ചതിന്റെ വിശദാംശങ്ങള്‍ പോസ്റ്റുന്നു.
230 വോള്‍ട്ട് ലൈന്‍ കരണ്ട് ഉപയോഗിക്കാന്‍ സാധിക്കുന്നവിധം രൂപകല്‍പ്പന ചെയ്യാമെന്ന ധാരണയിലാണ് ശ്രമം ആരംഭിച്ചത്. എല്‍.ഇ.ഡിയെപ്പറ്റി മുമ്പിട്ടൊരുപോസ്റ്റില്‍ നടന്ന ചര്‍ച്ചയില്‍ ചിലവ് കുറഞ്ഞ രീതിയില്‍ ഇവ നിര്‍മ്മിക്കുന്നതിനെപ്പറ്റിയും ഉപയോഗിക്കാവുന്ന സര്‍ക്യൂട്ടുകളെപ്പറ്റിയും ഗൌരവമായി തന്നെ ചര്‍ച്ച നടന്നിരുന്നു. അതില്‍ വന്ന നിദ്ദേശങ്ങളും ഗൂഗിള്‍ സേര്‍ച്ചും നല്‍കിയ വിവരമനുസരിച്ച് കപ്പാസിറ്റര്‍ ഉപയോഗിച്ച് 230 വോള്‍ട്ടില്‍ ഉപയോഗിക്കുന്ന സര്‍ക്യൂട്ട് പരീക്ഷിക്കുകയാണ് ചെയ്തത്.


ആദ്യമായി സൌകര്യപ്രദമായൊരു കേസ് സംഘടിപ്പിക്കാനുള്ള ശ്രമമായിരുന്നു. കേടായ സി.എഫ്.എല്‍ ലാമ്പുകളുടെ കേസ് നല്ലോരു സാദ്ധ്യതയാണെന്ന് ചിത്രങ്ങള്‍ ശ്രദ്ധിച്ചാല്‍ മനസ്സിലാവും. സി.എഫ്.എല്‍ ട്യൂബ് ഊരിമാറ്റിയാല്‍ ലഭിക്കുന്ന അടപ്പിലെ നാലു തുളകളിലായി 12 എല്‍.ഇ.ഡികള്‍ പിടിപ്പിക്കാനായി. ഒരു ചെറിയ ജനറല്‍ പര്‍പ്പസ് ബോഡിലായി ഇവ സോള്‍ഡര്‍ ചെയ്യുകയാണെങ്കില്‍ നല്ലൊരു എല്‍.ഇ.ഡി ക്ലസ്റ്ററായി ഇതിനെ ഉപയോഗിക്കാം. ഉപഗോഗിക്കേണ്ട സര്‍ക്യൂട്ടുകള്‍ക്കനുസരിച്ച് എല്‍.ഇ.ഡികള്‍ ശ്രേണിയായോ സമാന്തരമായോ, രണ്ടും ഒരുമിച്ചോ ചെയ്യേണ്ടി വരും. ലെന്‍സ് ഇല്ലാത്ത തരം ചെറിയ ചൈനീസ് എല്‍.ഇ.ഡികളാണ് ഇവിടെ ഉപയോഗിച്ചിരിക്കുന്നത്. 10 വാട്ട് സി.എഫ് എല്‍ കേസില്‍ 12 മുതല്‍ 20 എണ്ണം വരെ ഉറപ്പിക്കാം.

സര്‍ക്യൂട്ട് വളരെ ലളിതമാണ്. എസി ലൈനില്‍ സീരീസായി ഘടിപ്പിച്ച ഒരു കപ്പാസിറ്ററും അതിന്റെ ഔട്ട്പുട്ട് ഡി.സി ആക്കാനുള്ള ഒരു ഒരു ഡയോഡ് ബ്രിഡ്ജ്, ഒരു ഫില്‍റ്റര്‍ കപ്പസിറ്റര്‍, ഇത്രയുമായാല്‍ കാര്യങ്ങള്‍ നടക്കും. ഈ സര്‍ക്യൂട്ട് ഇലക്ട്രോണിക്സ് ഫോര്‍ യു മാഗസിന്‍ പ്രസിദ്ധീകരിച്ചതിന്റെ ലിങ്ക് ഇതാ. ഒരു ജെനറല്‍ പര്‍പ്പസ് പിസിബിയുടെ കഷണത്തില്‍ വളരെ ലാഘവത്തില്‍ തന്നെ ഇത് നിര്‍മ്മിക്കാവുന്നതാണ്. ബോഡ് സി.എഫ്.എല്‍ കേസില്‍ ഒതുങ്ങുന്നതാവണം എന്നു മാത്രം. 12 എല്‍.ഇ.ഡികള്‍ ശ്രേണിയായി ഘപ്പിപ്പിക്കുകയും അത് ബോഡിലെ ഡി.സി ഔട്ട്പുട്ടില്‍ ഘടിപ്പിക്കുകയും ചെയ്താല്‍ ലൈറ്റ് തയ്യാര്‍.


ഇത് ടെസ്റ്റിങ് ആണ്. 230 വോള്‍ട്ടില്‍ 50 മില്ലി ആമ്പിയര്‍ കരണ്ട് ഒഴുകുന്നതായി കാണാം. അതായത് 230 X .050 = 11.50 വാട്ട് കരണ്ട് ഉപയോഗിക്കുന്നതായി കാണക്കാക്കാം (ഏകദേശം). 12 എല്‍.ഇ.ഡി സീരീസായി ഘപ്പിപ്പിച്ചപ്പോള്‍ രണ്ട് അറ്റങ്ങള്‍ തമ്മിലുള്ള പൊട്ടന്‍ഷ്യല്‍ വ്യത്യാസം 03 X 12 = 36 വോള്‍ട്ട് എന്നു കണക്കാക്കിയാല്‍ എല്‍.ഇ.ഡിയില്‍ ലഭിക്കുന്ന ഫലപ്രദമായ ഊര്‍ജ്ജ ഉപയോഗം 36 X .050 = 1.8 വാട്ട്. അതായാത് എഫിഷ്യന്‍സി 20 ശതമാനം. ഇതില്‍ തന്നെ എല്‍.ഇ.ഡിയുടെ ക്ഷമത കൂടി കണക്കാക്കിയാല്‍ ഫലപ്രദമായ വെളിച്ചം നല്‍കുന്നത് ഇതിലും കുറവായിരിക്കും. (ഈ കണക്കില്‍ ഒരു തിരുത്ത് ,മണിസാറിന്റെ കമന്റ് പ്രകാരം. മുകളില്‍ വാട്ട് എന്ന് പരാമര്‍ശിച്ചിരിക്കുന്നത് വോള്‍ട്ട് ആമ്പിയര്‍ ആണ് (VA). എ സി സര്‍ക്യൂട്ടുകളില്‍ പവര്‍ ഫാക്റ്റര്‍ കൂടി കണക്കിലെടുത്താല്‍ വാട്ട് = VA x pf. ആയതിനാല്‍ ഇത്രയധികം നഷ്ടമുണ്ടാവില്ലെന്ന് ഒരു അപ്ഡേറ്റ് ചേര്‍ത്തുവായിക്കുക).

സര്‍ക്യൂട്ട് പ്രവര്‍ത്തനം:

ഒരു എസി ലൈനില്‍ കപ്പാസിറ്റര്‍ ഏര്‍പ്പെടുത്തുമ്പോള്‍ നടക്കുന്ന പ്രവര്‍ത്തനങ്ങളെ സംഗ്രഹിക്കാന്‍ ഈ ഗ്രാഫ് ഉപയോഗപ്പെടുമെന്ന് കരുതുന്നു. ലൈന്‍ വോള്‍ട്ടേജ് ഒഴുക്കിനെ സൂചിപ്പിക്കാന്‍ നീല നിറവും , കരണ്ടിനെ സൂചിപ്പിക്കാന്‍ ചുവപ്പ് നിറവും ഉപയോഗിച്ചിരിക്കുന്നത് കാണുക. കപ്പാസിറ്ററിന്റെ പ്രവര്‍ത്തന ഫലമായി കരണ്ട് ഒഴുക്കില്‍ ലീഡ് വരികയും വോള്‍ട്ടേജിന്റ് ഗ്രാഫിന്റെ മുന്നിലായാണ് കരണ്ട് ഗ്രാഫ് പോകുന്നതെന്നും ശ്രദ്ധിക്കുക. ഇവ രണ്ടിന്റേയും ആകെത്തുകയായി ലൈനില്‍ ലഭിക്കുന്ന ആകെ ഫലം സൂചിപ്പിക്കാന്‍ പച്ച നിറത്തിലുള്ള ഗ്രാഫ് സഹായിക്കും. ഈ പ്രതിഭാസമാണ് ലൈന്‍ റിയാക്റ്റന്‍സായി നമുക്ക് ലഭിക്കുന്നത്.


റിയാക്റ്റന്‍സ് കാണാനുള്ള സമവാക്യം കൊടുത്തിരിക്കുന്നു, f ഫ്രീക്വസിയും C കപ്പാസിറ്ററിന്റ് മൂല്യവും (ഫാരഡില്‍) അകുന്നു. ഇതുപ്രകാരം നമുക്ക് ആവശ്യമായ കരണ്ട് ലഭിക്കാന്‍ ആവശ്യമായ കപ്പാസിറ്റര്‍ ഉപയോഗിക്കുക. ഇവിടെ 50 മില്ലി ആമ്പിയര്‍ കരണ്ട് ലഭിക്കാന്‍ 1.0 മൈക്രോ ഫാരഡ് കപ്പാസിറ്ററാണ് ഉപയോഗിച്ചിരിക്കുന്നത്.
ദോഷ വശങ്ങള്‍:
ഗുണത്തേക്കാളേറെ ദോഷങ്ങളാണ് ഈ സര്‍ക്യൂട്ടിന് പറയാനുള്ളതെന്നതിനാലാണ് ഗ്രാഫും ഫോര്‍മുലയും പ്രത്യേകം എടുത്തു പറഞ്ഞത്. ഗ്രാഫ് നോക്കുക, സ്വിച്ച് ഓണ്‍ ചെയ്യുമ്പോള്‍ കപ്പാസിറ്റര്‍ പൂര്‍ണ്ണമായും ഡിസ്ചാര്‍ജ് ആയ അവസ്ഥയില്‍ ലൈന്‍ വോള്‍ട്ടേജ് പൂജ്യത്തില്‍ നിന്നും ആരംഭിക്കുന്നു എന്ന സങ്കല്‍പ്പത്തിലുള്ള ഗ്രാഫും അതിനനുസരിച്ച സര്‍ക്യൂട്ടും ആണിത്. എന്നാല്‍ ലൈന്‍ കരണ്ട് 230ഇല്‍ നില്‍ക്കുന്ന സമയത്ത് സ്വിച്ചോണ്‍ ചെയ്യുകയാണെങ്കില്‍ വളരെ കുറഞ്ഞ സമയത്തേക്കാണെങ്കില്‍ പോലും ഉയര്‍ന്ന കരണ്ട് സര്‍ക്യൂട്ടില്‍ വരാന്‍ ഇടയാകും. ഇത് ഉപകരണത്തിന്റെ ആയുസ്സിനെ കുറക്കും. വളരെ കുറഞ്ഞ കരണ്ട് 5-10 മില്ലി ആമ്പിയര്‍ കരണ്ട് (ഇന്‍ഡിക്കേറ്റര്‍ എല്‍.ഇ.ഡി)ഉപയോഗിക്കുന്ന അവസരത്തില്‍ ഇത് കുഴപ്പങ്ങള്‍ ഉണ്ടാക്കാനിടയില്ലെങ്കിലും കരണ്ട് കൂടുതലായി ആവശ്യമായി വരുന്ന സാഹചര്യങ്ങളില്‍ (ഉദാ : ബ്രൈറ്റ് എല്‍ ഇല്‍ ഡി) ഇത് ഗുരുതരമായ ഒരു പ്രശ്നമായി വരുന്നു. ഉദാഹരണമായി ആകെ 100 മില്ലി ആമ്പിയര്‍ കരണ്ട് ഒഴുകണമെങ്കില്‍ 2.2 മൈക്രോഫാരഡ് കപ്പാസിറ്റര്‍ ഉപയോഗിക്കേണ്ടി വരും (ഫോര്‍മുല പ്രകാരം). ഇത് 100-200 വാട്ട് എസി മോട്ടോറില്‍ ഉപയോഗിക്കുന്ന സ്റ്റാര്‍ട്ട് / റണ്‍ കപ്പാസിറ്റര്‍ ആണെന്ന് ഓര്‍ക്കുക.
നിരീക്ഷണം:
ബ്രൈറ്റ് എല്‍.ഇ.ഡി വിളക്കുകള്‍ നിര്‍മ്മിക്കാന്‍ റിയാക്റ്റന്‍സ് സര്‍ക്യൂട്ട് ഉപയോഗപ്രദമല്ല. എമര്‍ജസി വിളക്കുകള്‍ , ടോര്‍ച്ചുകള്‍ തുടങ്ങിയവയിലെ ബാറ്ററി ചാര്‍ജര്‍ പോലെയുള്ള ഉപയോഗങ്ങള്‍ക്ക് ഇവ ഉപയോഗിക്കാം, ഉപയോഗിച്ചു വരുന്നു.
എസ്.എം.പി.എസുകള്‍:


മൊബൈല്‍ ചാര്‍ജറിലും മറ്റും ഉപയോഗിക്കുന്ന ബേസിക് പവര്‍ സപ്ലേ ആണ് ഉപയോഗിച്ചത്. സര്‍ക്യൂട്ടില്‍ വന്നിരുന്ന MJE 13001 ട്രാന്‍സിസ്റ്ററിനു പകരം 13003 ഉം, ട്രാന്‍സ്ഫോര്‍മറിനു പകരം കമ്പ്യൂട്ടര്‍ പവര്‍ സപ്ലേയില്‍ വന്നിരുന്ന 5 വോള്‍ട്ട് 2 ആമ്പിയര്‍ സ്റ്റാന്റ് ബൈ ട്രാന്‍സ്ഫോര്‍മര്‍‍ റീവൈന്റ് ചെയ്തുമാണ് ഉപയോഗിച്ചത്.
താരതമ്യേന മെച്ചപ്പെട്ട പ്രകടനമാണ് ഇത് നല്‍കിയതെന്ന് പറയാം. 50 മില്ലി ആമ്പിയര്‍ കരണ്ട് ഒഴുകുന്ന ,12 വോള്‍ട്ടില്‍ പ്രവര്‍ത്തിക്കുന്ന രീതില്‍ ഘടിപ്പിച്ച 12 എല്‍.ഇ.ഡി കള്‍, ആകെ 200 മി.ആ. കരണ്ട് എടുക്കുന്നു. 200 മില്ലി ആമ്പിയര്‍ ലോഡ് കരണ്ടില്‍ എസി.ലൈനില്‍ 25 മില്ലി ആമ്പിയര്‍ കരണ്ട് മാത്രമേ ഇത് എടുത്തുള്ളൂ. ഏകദേശം 5 വാട്ട് മാത്രം, 50 ശതമാനം ക്ഷമത. കൂടുതല്‍ മെച്ചപ്പെട്ട ഡിസൈനില്‍ ക്ഷമത വര്‍ദ്ധിപ്പിക്കാന്‍ സാധിക്കുന്നതാണ്.

ഡി.സി.പള്‍സ് സപ്ലേ:
ഏകദേശം 200 ഹെര്‍ഡ്സ് ഫ്രീക്സ്വസിയില്‍ 50 ശതമാനം ഡ്യൂട്ടി സൈക്കിള്‍ ഉള്ള ഒരു 555 ടൈമര്‍ സര്‍ക്യൂട്ട് പരീക്ഷിച്ചു നോക്കിയിരുന്നു. ഡ്രൈവ് ചെയ്യുന്ന ട്രാന്‍സിസ്റ്റര്‍, ശുദ്ധമായ ഡിസി കരണ്ടില്‍ 200 മില്ലി ആമ്പിയര്‍ കരണ്ട് ഒഴുകുന്ന ഡിസൈന്‍ ഉപയോഗിച്ച്,‍ 200 ഹേര്‍ഡ്സില്‍ 120 മില്ലി ആമ്പിയര്‍ കരണ്ട് എടുക്കുന്നതായാണ് കണ്ടത്. മാത്രവുമല്ല പള്‍സേറ്റിങ് കരണ്ട് ആയതിനാല്‍ എല്‍.ഇ.ഡി യുടെ റേറ്റ്ഡ് കരണ്ടിന്റെ രണ്ടോ മൂന്നോ ഇരട്ടി കരണ്ട് കൊടുക്കാനും തന്മൂ‍ലം കുറഞ്ഞ കരണ്ട് ഉപയോഗത്തില്‍ കൂടുതല്‍ പ്രകാശം ലഭിക്കുകയും ചെയ്യും.
എന്റെ നിരീക്ഷണങ്ങള്‍:
ആയുസ്സുള്ള എല്‍.ഇ.ഡില്‍ വിളക്കുകള്‍ നിര്‍മ്മിക്കണമെങ്കില്‍ നല്ല പവര്‍ സപ്ലേ കൂടിയേ തീരു.
ഒരു വീട്ടില്‍ 10 എല്‍.ഇ.ഡി വിളക്കുകള്‍ ഉപയോഗിക്കണമെങ്കില്‍ 10 പവര്‍ സപ്ലേ ഉപയോഗിക്കണമെന്നര്‍ത്ഥം. ഇത് മൊത്തം ചിലവ് വര്‍ദ്ധിപ്പിക്കാനും, കരണ്ട് ഉപയോഗം കൂട്ടുവാനും ഇടയാക്കുന്നു. ഡി.സിയില്‍ മാത്രം പ്രവര്‍ത്തിക്കുന്ന ഒരു ഉപകരണം എന്ന നിലയിലും, വീട്ടു സപ്ലേ എ.സി 230 വോള്‍ട്ട് ആയതുകോണ്ടും മൊത്തം വീട്ടിലേക്ക് ക്ഷമതയുള്ള, ആവശ്യത്തിനു ശേഷിയുള്ള ഒറ്റ പവര്‍ സപ്ലേ ഉപയോഗിക്കുകയും അതില്‍ നിന്നും വീടുമുഴുവന്‍ എത്തത്തക്കവണ്ണം പ്രത്യേകം വയറിങ് നടത്തി എല്‍.ഇ.ഡി , അതും പള്‍സേറ്റിങ് സര്‍ക്യൂട്ട് അടങ്ങിയ എല്‍.ഇ.ഡി , വിളക്കുകള്‍ ഉപയോഗിക്കുകയും ചെയ്യുക. തുടക്കത്തില്‍ ചിലവ് വരാമെങ്കിലും ദീര്‍ഘകാല ഉപയോഗത്തിന് ഈ രീതിയാവും അഭികാമ്യം.


കടപ്പാട്:
റിയാക്റ്റന്‍സ് സര്‍ക്യൂട്ടിന്റെ പ്രശ്നങ്ങളെക്കുറിച്ച് സൂചനകള്‍ നല്‍കിയ മണിസാറിന്.

34 comments:

അനില്‍@ബ്ലോഗ് // anil said...

എല്‍.ഇ.ഡി വിളക്കുകള്‍

Unknown said...

നല്ല പോസ്റ്റ്‌ അനിലേട്ടാ, അന്ന് അനിലേട്ടന്‍ ഇട്ട ലിങ്ക് നോക്കി ആ circuit നോക്കി കറന്റ്‌ അളന്നു നോക്കണം എന്ന് ഞാനും കരുതിയതാ പക്ഷെ നടന്നില്ല. u r great.
അപ്പോള്‍ Xc വെച്ചുള്ള circuit ചെയാതെ ഒരു കോമണ്‍ dc ലൈന്‍ വലിക്കുന്നതാകും നല്ലത് അല്ലെ...
മാര്‍കെറ്റില്‍ കാണുന്ന പല LED വിലക്കുകളും Xc വെച്ചുള്ള circuit ആണ് ഉപയോഗിച്ചിരിക്കുന്നത്. അത് കൊണ്ട് LED വീട്ടില്‍ എങ്ങനെ wire ചെയും എന്നൊരു കണ്‍ഫ്യൂഷന്‍ ഉണ്ടായിരുന്നു. അത് പോലെ ചെയാണോ അതോ dc line കൊടുക്കണോ എന്ന്.
ഇപ്പോള്‍ എന്തായാലും dc ലൈന്‍ തന്നെ കൊടുക്കാം എന്ന് തോന്നുന്നു ഈ പോസ്റ്റ്‌ വായിച്ചതിനു ശേഷം. അത് തന്നെയല്ലേ നല്ലത്? efficiency യും കൂടുക അങ്ങനെ ചെയതാല്‍ തന്നെ അല്ലെ?

ഉറുമ്പ്‌ /ANT said...

നന്നായി.
തുടരുന്നും ഇത്തരം കുനുഷ്ടുകൾ പ്രതീക്ഷിക്കുന്നു. :)

അരുണ്‍ കാക്കനാട് said...

ആശംസകള്‍ ....

Typist | എഴുത്തുകാരി said...

ഒരു ഓ ടോ: പരീക്ഷണശാലയിലെ തിരക്കില്‍ പതിവുകാഴ്ചകളെ മറക്കല്ലേട്ടോ.

Manoraj said...

pande...parikshana salaye enikk bhayama mashe.. veronnumkondalla.. poly technic chemistry labil oru buret pottichath vangi kodukkan njan kure kashtapettatha.. hahhaha

ശ്രീ said...

വളരെ ഉപകാരപ്രദമായ പോസ്റ്റ്, അനില്‍ മാഷേ.

പഠിയ്ക്കുന്ന കാലത്ത് EFYസ്ഥിരം വായിയ്ക്കുമായിരുന്നു. ഇപ്പോള്‍ പഴയ Soldering Iron വീട്ടിലിരുന്ന് തുരുമ്പെടുത്ത് കാണും. എന്തായാലും സമയം പോലെ ഇവനെ ഒന്ന് പരീക്ഷിയ്ക്കണമെന്ന് കരുതുന്നു. EFY ലിങ്കിനും നന്ദി. :)

ചാണക്യന്‍ said...

ഞമ്മക്കിതു വല്യ പിടിയില്ല....കേസു വിട്ടു...:):):)

jayanEvoor said...

വിജ്ഞാനപ്രദം.
നന്ദി!

അഭി said...

നല്ല പോസ്റ്റ്‌ , കുറെ വിഞാനപ്രദമായ കാര്യങ്ങള്‍ ആണ്
നന്ദി :)

ഗ്രീഷ്മയുടെ ലോകം said...

അനില്‍,
ഒരു ചെറിയ തെറ്റ് ചുണ്ടിക്കാണിക്കട്ടെ: കപ്പാസിറ്റര്‍ ഉപയോഗിച്ച് 12 എല്‍ ഇ ഡി കള്‍ പ്രകാശിപ്പിക്കുമ്പോള്‍ അത് ഏകദേശം 12 W എടുക്കുമെന്ന് എഴുതിയിരിക്കുന്നത് ശരിയല്ല. ആ സര്‍ക്ക്യൂട്ട് 230 X 50 മില്ലി ആമ്പിയര്‍, അതായത് 11.5 വോള്‍ട് ആമ്പിയര്‍ (VA) എടുക്കും. എന്നാല്‍ പവര്‍, വാട്സില്‍ (W ല്‍) കണക്കാക്കുമ്പോള്‍ പവര്‍ ഫാക്റ്റര്‍ കൂടി കണക്കിലെടുക്കണം. സര്‍ക്ക്യുട്ടില്‍ കപ്പാസിറ്റീവ് റിയാക്റ്റന്‍സ് കൂടുതലായതിനാല്‍ പവര്‍ ഫാക്റ്റര്‍ (ഏകദേശം 0.2 മാത്രം) തീരെ കുറവായിരിക്കും. അതിനാല്‍ സര്‍ക്ക്യൂട്ട് 2 വാട്ടില്‍ താഴെ മാത്രമേ ലോഡ് ചെയ്യൂ.

ശങ്കറിനോട്: മുറികളിലെല്ലാം ഡി സി ലൈന്‍ വലിച്ച് എല്‍ ഇ ഡി ലാമ്പുകള്‍ ഘടിപ്പിക്കുന്നത് നല്ല ഒരാശയമാണ്. അത്തരത്തില്‍ ചിന്തിച്ചതുകൊണ്ട് എന്റെ വീട്ടില്‍ ഞാന്‍ ഡി സി ലൈന്‍ വലിച്ചിട്ടുണ്ട്. എന്നാല്‍ എല്‍ ഈ ഡി ലാമ്പുകള്‍ നിര്‍മിക്കാന്‍ ഇതുവരെ സമയം കിട്ടിയില്ല!

പരീക്ഷണങ്ങള്‍ തുടരാനും, അവ ബ്ലോഗില്‍ പ്രകാശിപ്പിക്കാനും അനില്‍ കാണിക്കുന്ന താല്പര്യങ്ങള്‍ക്ക് ഒരിക്കല്‍ കൂടി അഭിനന്ദനങ്ങള്‍.

Unknown said...

@മണി സര്‍,
dc ലൈന്‍ വലിക്കുന്നത് തന്നെയല്ലേ Xc ആധാരമായിട്ടുള്ള circuit ഉപയോഗിക്കുന്നതിനേക്കാള്‍ energy സേവ് ചെയുക?
ഇത് ച്യുന്നതിനു വേണ്ടി കുറച്ചു സംശയഗല്‍ ഉണ്ട്.
1) ഇതു എന്ത് തരം wire ഉപയോഗിച്ചാണ്‌ ചെയ്തത്? സാദാരണ wiring ഇന് ഉപയോഗിക്കുന്ന തരം wire കല്‍ ഇത് ആവശ്യമില്ലല്ലോ .
2) മണി സര്‍ ഉദേശിച്ചത്‌ LED ഉപയോഗിച്ചുള്ള dim light ആണോ അതോ വായിക്കാന്‍ പറ്റുന്ന bright light ആണോ?
3) റൂമില്‍ നിന്നും എത്ര ഉയരത്തില്‍ ആണ് LED ഉടെ പോയിന്റ്‌ കൊടുത്തിരിക്കുന്നത്?
4) എത്ര വോള്‍ട്ട് dc ആണ് കൊടുക്കാന്‍ ഉദ്ദേശിക്കുന്നത്?
5) LED കൊടുക്കാന്‍ പറ്റുന്ന fixtures എങ്ങനെ ആണ് ഉണ്ടാക്കാന്‍ പ്ലാന്‍?
6) ഞാന്‍ ഉദ്ദേശിക്കുന്നത് LED വെച്ച് കൊണ്ടുള്ള ഒരു dim ലൈറ്റ് ആണ് .സാധാരണ കിട്ടുന്ന whilte LED മതിയാകില്ലേ ഇതിനു?

ഈ കാര്യഗളില്‍ ഒരു ഒരു തീരുമാനം ആകാത്തത് കൊണ്ട് വീടിന്റെ wiring ഇപ്പോളും തുടഗിയിട്ടില്ല.

അനില്‍@ബ്ലൊഗ് said...

ശങ്കര്‍,
താത്പര്യത്തിനു നന്ദി.മണിസാര്‍ പറഞ്ഞത് കണ്ടരിക്കുമല്ലോ അല്ലെ.

ഉറുമ്പ്,
നന്ദി.

അരുണ്‍ കാക്കനാട്,
നന്ദി.

എഴുത്തുകാരി,
ചേച്ചീ, ഒരിക്കലുമില്ല.

Manoraj,
സന്ദര്‍ശനത്തിനു നന്ദി.

ശ്രീ,
എന്റെ മുറിയില്‍ പേന പോലെ സാധാരണമായ ഒന്നാണ് സോള്‍ഡറിങ് അയണ്‍.

ചാണക്യന്‍,
:)

ജയന്‍ഏവൂര്‍,
നന്ദി.

അഭി,
നന്ദി.

അനില്‍@ബ്ലൊഗ് said...

മണിസാര്‍,
വളരെ നന്ദി, ഇത്തരം തിരുത്തലുകളില്ലാതെ ഈ ബ്ലൊഗ് മുന്നോട്ട് പോകില്ല. കപ്പാസിറ്റീവ് ലോഡായിട്ട് പോലും പവര്‍ ഫാക്റ്റര്‍ എന്ന് സംഗതിയെപ്പറ്റി ഓര്‍ത്തതേ ഇല്ല.
അപ്പോള്‍ രണ്ട് വാട്ട് മാത്രമേ എടുക്കുകയുള്ളൂവെങ്കില്‍ ഇത് വളരെ ക്ഷമതയുള്ളതാ‍ണെന്ന് കണക്കാക്കേണ്ടി വരില്ലെ?
മാത്രവുമല്ല ഇന്‍ഡക്റ്റീവ് ലോഡുകള്‍ കൂടുതലുള്ള നമ്മുടെ ലൈനില്‍ കൂടുതല്‍ കപ്പാസിറ്ററുകള്‍ വരുന്നത് പ്രോത്സാഹിക്കപ്പെടുകയല്ലെ വേണ്ടത്?

ശങ്കര്‍,
എന്റെ അഭിപ്രായങ്ങള്‍ പറയാം, കൂടുതലായി മണിസാര്‍ പറയുമെന്ന് കരുതുന്നു.

ഇതു എന്ത് തരം wire ഉപയോഗിച്ചാണ്‌ ചെയ്തത്? സാദാരണ wiring ഇന് ഉപയോഗിക്കുന്ന തരം wire കല്‍ ഇത് ആവശ്യമില്ലല്ലോ .

റസിസ്റ്റര്‍ന്‍സ് പരമാവധി കുറവുള്ള വയറിങ് തന്നെ വേണം.

എത്ര വോള്‍ട്ട് dc ആണ് കൊടുക്കാന്‍ ഉദ്ദേശിക്കുന്നത്?

36/ 48 ആവും നല്ലതെന്നാണ് എന്റെ അഭിപ്രായം. ഉപയോഗിക്കേണ്ടി വരുന്ന് എല്‍.ഇ.ഡികളുടെ എണ്ണം അനുസരിച്ച് ലൈനില്‍ കരണ്ട് മിനിമം ആയി നിലനിര്‍ത്താന്‍ ഇതായിരിക്കും നല്ലത്.

LED കൊടുക്കാന്‍ പറ്റുന്ന fixtures എങ്ങനെ ആണ് ഉണ്ടാക്കാന്‍ പ്ലാന്‍?

സി.എഫ്.എലിന്റെ കേസിങ് ആണ് ഏറ്റവും വിലകുറവും സൌകര്യപ്രദവും.

ഞാന്‍ ഉദ്ദേശിക്കുന്നത് LED വെച്ച് കൊണ്ടുള്ള ഒരു dim ലൈറ്റ് ആണ് .സാധാരണ കിട്ടുന്ന whilte LED
മതിയാകില്ലേ ഇതിനു?


നൈറ്റ് ലാമ്പ് പോലെയുള്ള ഒരു ലൈറ്റിങ് ആണെങ്കില്‍ സാധാരണ എല്‍ ഇ ഡി മതിയാകും. വായിക്കണമെങ്കില്‍ ബ്രൈറ്റ് എല്‍.ഇ.ഡി തന്നെ വേണം.

Unknown said...

അനിലേട്ടന്‍,
കുറച്ചു സംശയങ്കല്‍..........
1) റസിസ്റ്റര്‍ന്‍സ് പരമാവധി കുറവുള്ള വയറിങ് തന്നെ വേണം.
ഇത് ഏതു wire ആണ്? wiring ഇന് ഉപയോഗിക്കുന്ന 1m2 wire ആണോ ഉദേശിച്ചത്? ഫോണ്‍ ഇന് വേണ്ടി ഉപയോഗിക്കുന്ന wire മതിയാകുമോ?
2) 36/ 48 V എന്ന് പറയുന്നത് കുറച്ചു കൂടുതല്‍ അല്ലെ? LED connect ചെയാന്‍ വേണ്ടി നമ്മള്‍ ഒരുപാട് voltage drop ചെയ്തു കളയേണ്ടി വരില്ലേ? 3V or 6V കൊടുത്തു LED പരല്ലേല്‍ ആയിട്ടു കണക്ട് ചെയ്താല്‍ പോരെ?
3) നമ്മള്‍ എന്തിനാ current കുറക്കുന്നെ? നമ്മള്‍ എത്ര കൊടുത്താല്‍ അതിന്റെ rating അനുസരിച്ചുള്ള കറന്റ്‌ അല്ലെ അത് എടുക്കുകയുള്ളൂ?

അനില്‍@ബ്ലൊഗ് said...

ശങ്കര്‍,
ഞാന്‍ എന്റെ നിരീക്ഷണങ്ങള്‍ പറഞ്ഞു എന്നേ ഉള്ളൂ. നമുക്ക് അതിലും ഒന്ന് വര്‍ക്ക് ചെയ്ത് നോക്കാം.
:)

റസിസ്റ്റന്‍സ് കുറവുള്ള വയര്‍ എന്ന് വച്ചാല്‍ ഹൌസ് വയറിങിന് ഉപയോഗിക്കുന്ന വയര്‍ തന്നെ വേണ്ടി വരും എന്നാണ് ഞാന്‍ കരുതുന്നത്. ഫോണിന് ഉപയോഗിക്കുന്ന വയര്‍ വളരെ ഗേജ് കുറഞ്ഞതായതിനാല്‍ അതിന്റെ റസിസ്റ്റന്‍സ് കൂടുതലായിരിക്കും.

ലൈന്‍ കരണ്ട് എത്രയും പരമാവധി കുറക്കാമോ അത്രയും കുറക്കുന്ന രീതിയില്‍ വേണം എല്‍.ഇ.ഡി കണക്റ്റ് ചെയ്യാന്‍. ലൈന്‍ കരണ്ടിന്റെ സ്ക്വയറിന് പ്രൊപ്പോഷണലാണല്ലോ ലോസ്സ്. എനിക്ക് കിട്ടിയ രണ്ട് ടൈപ്പ് എല്‍.ഇ.ഡി കളും വച്ച് നോക്കിയാല്‍ 12 - 20 എണ്ണം ഉപയോഗിച്ചാലെ മുറിമുഴുവന്‍ തെളിഞ്ഞ പ്രകാരം കിട്ടുന്നുള്ളൂ. 12 ഡയോഡ് പാരലല്‍ ആയി കൊടുത്താല്‍ ആവശ്യമാകുന്ന കരണ്ട് 0.025 x 12 = .300 ആമ്പിയര്‍ വരും, അത്തരം പത്ത് എണ്ണം കണക്റ്റ് ചെയ്യേണ്ടി വന്നാല്‍ അത് 3.00 ആമ്പിയര്‍ ആകുന്നു. എന്നാല്‍ 12 എണ്ണം 48 വോള്‍ട്ടില്‍ സീരീസായി ഉപയോഗിച്ചാല്‍ 30 (ഏകദേശം) മില്ലി ആമ്പിയറും, 10 യൂണിറ്റിന് 300 മില്ലി ആമ്പിയറുമേ വരുന്നുള്ളൂ. ഇവ രണ്ടും വയറിങ് റസിസ്റ്റന്‍സില്‍ ഏര്‍പ്പെടുത്തുന്ന ലോസ്സ് താരതമ്യം ചെയ്ത് നോക്കൂ.

ഹൈ ബ്രൈറ്റ് എല്‍.ഇ.ഡികള്‍ (താങ്കള്‍ പറഞ്ഞ മലപ്പുറം ടീം ഉപയോഗിക്കുന്നത് അത്തരം ആണെന്ന് പറയുന്നത് കേട്ടു), 4.8 വോള്‍ട്ട് 15 മില്ലി ആമ്പിയര്‍ ആണെന്‍ പറയുന്നതു കേട്ടു. ഈ സാഹചര്യത്തില്‍ ലൈന്‍ കരണ്ട് കുറക്കാന്‍ വോള്‍ട്ടേജ് ഉയര്‍ത്തി വക്കുകയാണ് നല്ലത്.
എല്‍.ഇ.ഡി ഒരെണ്ണം അല്ലല്ലോ നമ്മള്‍ ഉപയോഗിക്കുക, ക്ലസ്റ്ററുകളാണ്.

കൂടുതല്‍ കരണ്ട് കൊടുത്ത് പള്‍സേറ്റിങ് ഡിസിയില്‍ പ്രവര്‍ത്തിപ്പിക്കുന്നതിനെപ്പറ്റി ഞാന്‍ പറഞ്ഞിരുന്നല്ലോ, അത്തരം സര്‍ക്യൂട്ടികള്‍ക്കും കൂടുതല്‍ വോള്‍ട്ടേജ് ആവശ്യമായി വരും. എല്‍.ഇ.ഡിക്ക് കൃത്യം ആവശ്യമായ വോള്‍ട്ടേജ് മാത്രം ഉപയോഗിച്ച് റസിസ്റ്റന്‍സ് ഇല്ലാതെ പ്രവര്‍ത്തിപ്പിച്ചാല്‍ സര്‍ക്യൂട്ട് കരണ്ടില്‍ നമുക്ക് യാതൊരു നിയന്ത്രണവുമില്ലാതെ വരും, എല്‍.ഇ.ഡി കളേതെങ്കിലും ഒക്കെ ഷോര്‍ട്ട് സര്‍ക്യൂട്ട് ആയാല്‍ മൊത്തം വയറിങ് തന്നെ നാശമാവും. അതുകൊണ്ട് കരണ്ട് ലിമിനിങ് റസിസ്റ്റന്സും അതിനനുസരിച്ച് ഉയര്‍ന്ന് വോള്‍ട്ടേജും കൂടിയേ മതിയാവൂ.

ഇനി മണിസാര്‍ എന്തു പറയുന്നു എന്ന് നോക്കാം.

ഗ്രീഷ്മയുടെ ലോകം said...

പ്രിയ അനില്‍, ശങ്കര്‍,
രണ്ട് ദിവസത്തേക്ക് തെരക്കാണ്. ഒരു ഔദ്യോഗിക യാത്ര, തിരുവനന്തപുരത്തേക്ക്. തിരിച്ച് വനിട്ട് വിശദമായി എഴുതാം.

Unknown said...

അനിലേട്ടാ,
ഒരു തിരുത്ത്‌,വ്യാസം കൂടുതല്‍ ഉള്ള കമ്പികള്‍ക്ക്‌ ഗേജ് കുറവ് ആയിരിക്കും.
ഗേജ് എന്ന അളവ് വ്യാസം കൂടുന്നതിന് അനുസരിച്ച് കുറയുകയാണ് ചെയുക. സാദാരണ എല്ലാവരും തിരിച്ചാണ് ചിന്തിക്കുന്നത്.
ഗേജ് അളക്കുന്ന Standard Wire Gauge എന്ന ഉപകരണത്തില്‍ അത് അടയാളപെടുതിയിരിക്കുന്നത് ഒന്ന് നോക്കു.
LED സീരീസ്‌ ആയിട്ടു കൊടുക്കുന്നത് കറന്റ്‌ കുറക്കാന്‍ ഒരു നല്ല ആശയം തന്നെയാണ്.
ഇങ്ങനെ കൊടുക്കുമ്പോള്‍ ഒരു LED ക്ക് എത്രമാത്രം voltage drop ഉണ്ട് എന്ന് നോക്കി മൊത്തം എത്ര LED ഉണ്ടോ അതിനു കണക്കാക്കി വേണ്ടേ കൊടുക്കാന്‍ .
ഇങ്ങനെ കൊടുക്കുമ്പോള്‍ ചില കര്യഗല്‍ നോക്കേണ്ടത് ഇല്ലേ...
1) series ആയിട്ട് കണക്ട് ചെയ്യുന്ന എല്ലാം ഒരേ rating ഉള്ളതാകണം.
2) ഒരു LED അടിച്ചു പോയാല്‍ മൊത്തം light ഉം പോവും.
3) കേടുവന്നാല്‍ മാറ്റിവെക്കാന്‍ അതേ rating ഉള്ള LED കിട്ടാന്‍ ബുദ്ധിമുട്ടായിരിക്കും. കാരണം കടയില്‍ നിന്നും LED വാങ്ങുമ്പോള്‍ രേസിസ്റെര്‍ പോലെ വാല്യൂ പറഞു വാങ്ങാന്‍ പറ്റില്ലല്ലോ. അപ്പോള്‍ മൊത്തത്തില്‍ മാറ്റി വെക്കേണ്ടി വരും.
4) ഒരു ലൈറ്റ് ഇല സീരീസ്‌ ആകി കൊടുത്തു എല്ലാ ലൈറ്റ് കളും പരലേല്‍ ആക്കുന്നതാകും നല്ലത് .

അനില്‍@ബ്ലൊഗ് said...

ശങ്കര്‍,
ശരിയാണ് ഗേജ് കുറവാണെന്ന് ഉദ്ദേശിച്ചത് കനം കുറഞ്ഞതാണെന്ന് അര്‍ത്ഥത്തിലാണ്, ഗേജ് കൂടുന്നതിനനുസരിച്ച് കനം കുറയുകയാണ് ചെയ്യുന്നത്.

മാര്‍ക്കറ്റില്‍ ഇപ്പോള്‍ വരുന്ന മിക്കവാറും ലൈറ്റുകളില്‍ എല്‍.ഇ.ഡികള്‍ സീരീസായി കണക്റ്റ് ചെയ്തിട്ടുള്ളവയാണ്.

എല്‍.ഇ.ഡി കള്‍ വ്യാപകമവുന്നതോടെ നമ്പറും ഡാറ്റാഷീറ്റുമടക്കം തന്നെ നമുക്ക് ലഭിക്കും എന്ന് പ്രതീക്ഷിക്കാം.

ഗ്രീഷ്മയുടെ ലോകം said...

പ്രിയ അനില്‍,
ഇപ്പോഴാണ് എഴുതാന്‍ സമയം കിട്ടുന്നത്.
മാത്രവുമല്ല ഇന്‍ഡക്റ്റീവ് ലോഡുകള്‍ കൂടുതലുള്ള നമ്മുടെ ലൈനില്‍ കൂടുതല്‍ കപ്പാസിറ്ററുകള്‍ വരുന്നത്
പ്രോത്സാഹിക്കപ്പെടുകയല്ലെ വേണ്ടത്?

അനിലിന്റെ ഈ ചോദ്യത്തിനുള്ള ഉത്തരം:
തീര്‍ച്ചയായും, കപ്പാസിറ്റിവ് കറന്റ് ലിമിറ്റിങ് ഉള്ള സര്‍ക്ക്യൂട്ട് അക്കാര്യത്തില്‍ ഉപയോഗ പ്രദമാണ്. ഊര്‍ജ്ജ നഷ്ടവും വളരെ കുറവായിരിക്കും. transient നെതിരെ സരക്ഷണം വേണം, പിന്നെ isolation ഇല്ല എന്ന രണ്ട് കാര്യങ്ങള്‍ ഒഴിച്ചാല്‍ കപ്പാസിറ്റര്‍ സര്‍ക്ക്യൂട്ടിന് ഗുണങ്ങള്‍ ഏറെ ഉണ്ട് താനും.

ഇനി ഡി സി വയറിംഗിന്റെ കാര്യം: ഓരോ ലൈറ്റ് പോയിന്റിലും കൂടുതല്‍ എല്‍ ഇ ഡികള്‍ സീരീസ് ആയി ഘടിപ്പിച്ച് കൂടുതല്‍ വോള്‍ട്ടേജില്‍ പ്രവര്‍ത്തിപ്പിക്കുന്നത് ലൈനിലുള്ള ഊര്‍ജജ നഷ്ടവും, വോള്‍ടേജ് നഷ്ടവും കുറക്കാന്‍ സഹായിക്കും എന്നാല്‍ എത്രയാവണം ലൈന്‍ വോള്‍ടേജ് എന്നതിനു മറ്റു ചില കാര്യങ്ങള്‍ കൂടി കണക്കിലെടുക്കേണ്ടതുണ്ട്.
അതിലൊന്ന് ശങ്കര്‍ സൂചിപ്പിച്ചതാണ്. മൊത്തം എല്‍ ഇ ഡി കളും സീരീസ് ആയി പിടിപിച്ചാല്‍ ഒരെണ്ണം
open circuit അയാല്‍ വെളിച്ചം പൂര്‍ണമായും ഇല്ലാതാവുമല്ലോ. ഏറ്റവും നല്ലത്, series ആയും parallel ആയും വയര്‍ ചെയ്യുക എന്നതാണ്.
മറ്റൊന്നുള്ളത് നാം പിടിപ്പിക്കുന്ന ലൈറ്റിന്റെ കണ്ട്രോള്‍ സര്‍ക്ക്യൂട്ടിനെ പറ്റിയുള്ളതാണ്. ഉദാഹരണത്തിന് ഞാന്‍ വിഭാവനം ചെയ്യുന്ന ലൈറ്റ് പോയിന്റിന്, വെളിച്ചം സ്വയം ക്രമീകരിക്കാനും റിമോട്ട് ആയി നിയന്ത്രിക്കാനുമുള്ള സംവിധാനം ഉണ്ട്. അത്തരം സംവിധാനത്തിനു ഒരു മൈക്രോ കണ്ട്രോളര്‍ ആവശ്യമുണ്ട്. ഈ കണ്ട്രോള്‍ സംവിധാനം സാധാരണ ഗതിയില്‍ 5 വോള്‍ടില്‍ ആയിരിക്കും പ്രവര്‍ത്തിക്കുക.
ലൈന്‍ വോള്‍ട്ടേജ് 26/ 48 വോള്‍ട് ഒക്കെ ആണെങ്കില്‍ ആ വോള്‍ട്ടതയില്‍നിന്നും 5 V യിലേക്ക് ഊര്‍ജ നഷ്ടം കൂടാതെ താഴ്ത്താന്‍ ബുദ്ധിമുട്ടാണ്.
മറ്റൊന്ന് ഈ ലൈനിനാവശ്യമായ വോള്‍ട്ടേജ് ഉണ്ടാക്കാനുള്ള സംവിധാനമാണ്. എന്റെ ആവശ്യത്തിന് ഞാന്‍ ഒരു 12 V സോളാര്‍ പാനലും ഒരു ലെഡ് ആസിഡ് ബാറ്ററിയുമാണ് ഉദ്ദേശിക്കുന്നത്.
അധികം ലോഡ് (ഏറ്റവും കൂടുതല്‍ 100 w) ഇല്ല എങ്കില്‍ 12 V മതിയാകുമെന്ന് തോന്നുന്നു.
ഒരു മുറിയില്‍ 10 w എല്‍ ഇ ഡി ധാരാളം മതിയാവും. ആ വെളിച്ചത്തില്‍ നന്നായി വായിക്കാനും
കഴിയും. സാധാരണയായി കിട്ടുന്ന ( 40 പൈസ മുതല്‍ 1 രൂപവരെ വിലയുള്ള 100 mW) എല്‍ ഇഡി 100 എണ്ണമോ., 1 w ന്റെ 10 എണ്ണമോ. ഉപയോഗിക്കാം. ഡിം ലൈറ്റ് മതിയെങ്കില്‍ ഒരു മുറിക്ക് 1 W ഒക്കെ മതിയാവും.
എല്‍ ഇഡി fixtures ചൈനയില്‍ നിര്‍മിച്ചത് വാങ്ങാന്‍ കിട്ടും അല്ലെങ്കില്‍ ഒരു അക്രിലിക് ഷീറ്റില്‍ കവര്‍ ഉണ്ടാക്കി അതിനകത്ത് വയര്‍ ചെയ്തെടുക്കാം
ഞാന്‍ എല്‍ ഇ ഡീ ലൈറ്റ് പോയിന്റ് ഏകദേശം 2 മീറ്റര്‍ ഉയരത്തിലാണ് ഘടിപ്പിക്കാന്‍ ഉദ്ദേശിക്കുന്നത്.
(സ്വിച്ചുകളൊന്നുമില്ല, എല്ലാം റിമോട്ട് കണ്ട്രോള്‍!)

എല്‍ ഇ ഡി കള്‍ കറന്റ് ലിമിറ്റിംഗ് റെസിസ്റ്റര്‍ ഉപയോഗിച്ച് വയര്‍ ചെയ്യുന്നത് വലരെ ലളിതമായ രീതിയാ‍ണെങ്കിലും, വോള്‍ട്ടേജ് മാറുന്നതിനനുസരിച്ച് വെളിച്ചത്തില്‍ വ്യത്യാസം വരും. അതിനാല്‍ ചെലവു കൂടുതലാണെങ്കിലും, എല്‍ ഇ ഡി ഡ്രൈവര്‍ ചിപ്പ് ഉപയോഗിക്കുന്നതാണ് ഉത്തമം.

Unknown said...

മണി സര്‍,
DC ലൈന്‍ വലിക്കുന്നതാണോ അനില്‍ ഏട്ടന്‍ പറഞ്ഞ പോലത്തെ Xc ആധാരംയിട്ടുള്ള circuit വെച്ച് ചെയുന്നതാണോ ലാഭം?
വീടുമുഴുവന്‍ DC line വലിക്കുന്നതിനുള്ള ചെലവ് മാറിക്കടക്കാന്‍ മാത്രം ഒരു ലാഭം power usage ഇന്റെ കാര്യത്തില്‍ നമുക്ക് കിട്ടുമോ DC വെച്ച് ചെയുമ്പോള്‍? remote ഒന്നും ഇല്ലാതെ ?

അനില്‍@ബ്ലോഗ് // anil said...

മണിസാര്‍,
വളരെ നന്ദി.

ട്രാന്‍സിയന്റ്സിനെ ചെറുക്കുന്ന സംവിധാനങ്ങളോടെ കപ്പാസിറ്റര്‍ സര്‍ക്യൂട്ടുകള്‍ ഉപയോഗിക്കാം അല്ലെ.

ഒരു ചെറിയ ഡിലേയോടെ സ്വിച്ച് ചെയ്യുന്ന ഒരു സര്‍ക്യൂട്ട് പരീക്ഷിച്ചു നോക്കാമല്ലോ.

ഡിസി വലിക്കുന്ന കാര്യത്തില്‍ ചില വിയോജിപ്പുകള്‍.
1.100 വാട്ട്സ് എന്നാല്‍ 12 വോള്‍ട്ടില്‍ 10 ആമ്പിയറിനടുത്ത് കരണ്ട്, അത് വളരെ കൂടുതലാണ്, കനം , വില ഒക്കെ കൂടിയ വയറുകള്‍ ഉപയോഗിക്കെണ്ടി വരും, ലോസ്സ് തീര്‍ച്ചയായും കൂടുകതന്നെ ചെയ്യും.
2. മൈക്രോ കണ്ട്രോളര്‍ ഉപയോഗിക്കുന്ന സര്‍ക്യൂട്ടുകള്‍ കരണ്ടിന്റെ കാര്യത്തില്‍ പ്രിസിഷന്‍ തരുമെങ്കിലും കോസ്റ്റിഫക്റ്റീവ് അല്ല സാര്‍.
കോസ്റ്റ്/ഗുണം ഇവ തുലനം ചെയ്തേ എന്തും ഡിസൈന്‍ ചെയ്യാനൊക്കൂ. അതിനാല്‍ തന്നെ മൈക്രോ കണ്ട്രോളറുകള്‍ ഒഴിവാക്കിയെ പറ്റൂ. അങ്ങിനെയെങ്കില്‍ 5 വോള്‍ട്ടിന്റെ ആവശ്യവും വരുന്നില്ല.
3.കരണ്ട് ലിമിറ്റിങിങ് ഈ സിമ്പിള്‍ സര്‍ക്യൂട്ട് ധാരാളമാണെന്നാണ് എന്റെ നിരീക്ഷണം (വിലകൂടി കണക്കിലെടുത്താല്‍).

Unknown said...

അനിലേട്ടാ ആ ലിങ്ക് യില്‍ ഉള്ളത്
Darlington transistor pair അല്ലെ?
ഇത് ഒരു current source ആയിട്ടല്ലേ നമ്മള്‍ ഉപയോഗിക്കാറ്?
ULN series യില്‍ ഉള്ള IC ഉപയോഗിക്കുകയനെകില്‍ ഇതിന്റെ വലിപ്പം വീണ്ടും കുറക്കാന്‍ പറ്റില്ലേ/ ?
പിന്നെ മണി sir പറഞ്ഞപോലെ micro controller ചെലവ് അത്രമാത്രം കൂടും എന്ന് എനിക്ക് തോന്നുന്നില്ല. ഒരു റൂമില്‍ ഒരു മൈക്രോ കന്ട്രോല്ലെര്‍ മതിയാകുമല്ലോ. അത് ധാരാളം. അതിനു വലിയ വിലയൊന്നും ഇല്ല.
എന്റെ മുന്‍പുള്ള സംശയത്തിനു അനിലേട്ടന് ഉള്ള മറുപടി എന്താണ്?
if possible anil ettan and mani sir will u please provide u r email ids or can u send a mail to me?

അനില്‍@ബ്ലൊഗ് said...

ശങ്കര്‍,
അത് ഡാര്‍ലിങ്ടണ്‍ അല്ല.
കോന്‍സ്റ്റന്റ് കരണ്ട് ലഭിക്കുന്ന് ആ സര്‍ക്യൂട്ടിന് എന്ത് പേരാണുള്ളതെന്ന് എനിക്കറിയില്ല.
:)
അതില്‍ 2n 2222 കളക്റ്റര്‍ ലൈനിലാണ് എല്‍.ഇ.ഡി വരിക, 220 ഓംസ് കൊടുത്ത് ഫോര്‍വേഡ് ബയാസ് ചെയ്തിരിക്കുന്നത് BC 548 നാല്‍ നിയന്ത്രിതമാണ്. 548 ആവട്ടെ എല്‍.ഇ.ഡി ക്ക് സീരീസായി ഘടിപ്പിച്ചിരിക്കുന്ന റസിറ്റ്സറില്‍ കൂടിയുള്ള കരണ്ട് ഫ്ലോക്ക് പ്രൊപോഷണലായി പ്രവര്‍ത്തിക്കുന്നു, സിമ്പിള്‍, പക്ഷെ ഉപയോഗപ്രദം.

ഞാന്‍ ഒരു തലമുറ പിന്നിലാണ്, മൈക്രോ കണ്ട്രോളര്‍ ഇപ്പോഴും ഞമ്മക്ക് ബാലികെറാ മലയാണ്.
:)

അനില്‍@ബ്ലൊഗ് said...

ശങ്കര്‍,
വേറെ എന്താ അഭിപ്രായം ചോദിച്ചത്?
എന്റെ മെയില്‍ ഐഡി പ്രൊഫൈലില്‍ തന്നെ ഉണ്ടല്ലോ, anilatblog@gmail.com

Unknown said...

micro controller simple ആണ്. 8051 micro controllers and Embedded Systems By Mazidi എന്ന ബുക്ക്‌ ഒന്ന് സങ്കടിപ്പിക്കാന്‍ നോക്കു. അനിലേട്ടന്‍ പുലിയാകും അതില്‍ .
വേറെ അഭിപ്രായം dc ലൈന്‍ വലിക്കുന്നതിനെ പറ്റി തന്നെ മുകളില്‍ ഇട്ടതു
DC ലൈന്‍ വലിക്കുന്നതാണോ അനില്‍ ഏട്ടന്‍ പറഞ്ഞ പോലത്തെ Xc ആധാരംയിട്ടുള്ള circuit വെച്ച് ചെയുന്നതാണോ ലാഭം?
വീടുമുഴുവന്‍ DC line വലിക്കുന്നതിനുള്ള ചെലവ് മാറിക്കടക്കാന്‍ മാത്രം ഒരു ലാഭം power usage ഇന്റെ കാര്യത്തില്‍ നമുക്ക് കിട്ടുമോ DC വെച്ച് ചെയുമ്പോള്‍?
അതിന്റെ കണ്‍ഫ്യൂഷന്‍ അങ്ങ് മാറുന്നില്ല.
വലിയ വെത്യാസം ഇല്ലെങ്കില്‍ Xc based circuit തന്നെയല്ലേ ലാഭം?
മെയില്‍ id ഞാന്‍ അവിടെ കണ്ടില്ല അതാ

അനില്‍@ബ്ലൊഗ് said...

ശങ്കര്‍,
230 വോല്‍ട്ടില്‍ നിന്നും എല്‍.ഇ.ഡിക്കാവശ്യമായ ലെവലിലേക്ക് വോള്‍ട്ടേജ് കുറച്ച് കൊണ്ടുവരുന്നതിനാവശ്യമായ സര്‍ക്യൂട്ട്സ് ഫെയിലാവാനുള്ള സാദ്ധ്യത (ദീര്‍ഘകാലാടിസ്ഥാനത്തില്‍, ഓരോ ലൈറ്റിനും അതുണ്ടാക്കുന്ന ചിലവ് എന്നിവ പരിഗണിച്ചാല്‍ ഡി.സി ലൈന്‍ വേറെ വലിക്കുകയാണ് ഉത്തമം.
വോള്‍ട്ടേജിന്റ് കാര്യം നമ്മുടെ ലോജിക് പോലെ ചെയ്യാം.
:)

ഗ്രീഷ്മയുടെ ലോകം said...

ശങ്കർ, മറ്റ് ആവശ്യങ്ങളൊന്നും ഇല്ല എങ്കിൽ പ്രത്യേകിച്ച് ഡിസി ലൈൻ വലിക്കാതെ തന്നെ അനിൽ ഉപയോഗിച്ചത് പോലെ ഉപയോഗിക്കാം. പ്രായോഗിക പ്രശ്നങ്ങൾ വളരെ ഏറെ ഉണ്ട്. (ഉദാഹ്രരണത്തിനു ഇൻവെർട്ടർ ഉപയോഗിക്കുമ്പോൾ ശ്രദ്ധിക്കണം സ്ക്വയർ വേവ് output ആണെങ്കിൽ ഈ സർക്ക്യൂട്ട് കുളമാവും)
ട്രാന്‍സിയന്റ്സിനെ ചെറുക്കുന്നസംവിധാനങ്ങളോടെ കപ്പാസിറ്റര്‍ സര്‍ക്യൂട്ടുകള്‍ ഉപയോഗിക്കാം അല്ലെ., ഒരു ചെറിയ ഡിലേയോടെ സ്വിച്ച് ചെയ്യുന്ന ഒരു സര്‍ക്യൂട്ട് പരീക്ഷിച്ചു നോക്കാമല്ലോ.
കപ്പാസിറ്ററിനു സീരീസ് ആയി ഒരു എൻ ടി സി റെസിസ്റ്റർ ഘടിപ്പിക്കുകയോ, ഒരു zenar ഡയോഡ് ഉപയോഗിച്ച് എൽ ഈ ഡി വോൾടേജ്ജ് ലിമിറ്റ് ചെയ്തോ ഇത് സാധിക്കുന്നതാണ്.

100 വാട്ട്സ് എന്നാല്‍ 12 വോള്‍ട്ടില്‍ 10 ആമ്പിയറിനടുത്ത് കരണ്ട്, അത് വളരെ കൂടുതലാണ്, കനം , വില ഒക്കെ കൂടിയ വയറുകള്‍ ഉപയോഗിക്കേണ്ടി വരും, ലോസ്സ് തീര്‍ച്ചയായും കൂടുകതന്നെ ചെയ്യും.
അനിൽ പറയുന്നത് വളരെ ശരിയാണ്. 10 ആമ്പിയർ ഒഴുക്കാൻ വണ്ണം കൂടുതലുള്ള കമ്പി ഉപയോഗിക്കണം. ഞാൻ ഉപയോഗിച്ചത് 4.5 സ്ക്വയർ mm കമ്പിയാണ്. കാര്യമായ voltage drop ഇല്ല. പിന്നെ 10 A എന്നത് മാക്സിമം കറന്റാണ്. അത്രയും കറന്റ് സാധാരണ ഗതിയിൽ ആവശ്യം വരില്ല.
സാധാരണ ആവശ്യത്തിനു, കപ്പാസിറ്റർ ഉപയോഗിച്ചുള്ള സാങ്കേതിക വിദ്യ തന്നെ ഏറ്റവും എളുപ്പം. എന്നാൽ മറ്റു ആവശ്യങ്ങൾ (ഉണ്ടെങ്കിൽ) പരിഗണിക്കുമ്പോൾ മാത്രമേ ഡി സി ലൈൻ, കണ്ട്രോളർ എന്നിവ ചിത്രത്തിൽ വരികയുള്ളു. അങ്ങനെ യാണെങ്കിൽ മൈക്രോ കണ്ട്രോളർ ഉപയോഗിക്കുന്നത് ലാഭകരവും, സൌകര്യപ്രദവും ആവും. (13 രൂപയ്ക്ക് വരെ മൈക്രോ കണ്ട്രോളർ വാങ്ങാൻ കിട്ടും!) കറന്റ് ലിമിറ്റ് ചെയ്യാൻ മാത്രമല്ല, ഞാൻ മൈക്രോ കണ്ട്രോളർ ഉപയോഗിക്കുന്നത്. കറന്റ് നിയന്ത്രിക്കാൻ മാത്രമാണെങ്കിൽ എൽ ഇ ഡി ഡ്രൈവർ ചിപ് ഉപയോഗിച്ചാൽ മാത്രം മതിയാവും.
അനിൽ,
അനിൽ ചൂണ്ടിക്കാണിച്ച കറന്റ് ലിമിറ്റിങ് സർക്ക്യൂട്ട് ലൊ വോൾടേജ് ഡി സി ക്കുമാത്രമേ പറ്റു. മാത്രവുമല്ല, Vdd കൂടിയാൽ കറന്റ് വ്യത്യാസം വരും സർക്യുട്ട് വരച്ച് സിമുലേറ്റ് ചെയ്യാൻ ഉപകരിക്കുന്ന സർക്ക്യൂട്ട് സിമുലേഷൻ സോഫ്റ്റ് വെയർ ഇന്റെർ നെറ്റിൽ നിന്നും ഡൌൺ ലോഡ് ചെയ്യാൻ കഴിയും. അതുപയോഗിച്ച് സർക്ക്യൂട്ടുകളുടെ പ്രവർത്തനം മനസ്സിലാക്കാവുന്നതാണ്.
ശങ്കർ, എന്റെ ഈ മെയിൽ mdotani@gmail.com
ഞാന്‍ ഒരു തലമുറ പിന്നിലാണ്, മൈക്രോ കണ്ട്രോളര്‍ ഇപ്പോഴും ഞമ്മക്ക് ബാലികെറാ മലയാണ്. ബാലിക്ക് പറ്റില്ലെങ്കിലും, അനിലിനു പറ്റും:)

roseadens said...

ഞാന്‍ ഇത് ആദ്യമൈട്ടാണ് ബ്ലോഗുകളില്‍ കമന്റ്‌ എഴുടനത് തെറ്റ് ഉണ്ടെങ്കില്‍ ക്ഷമികണം
എനിക്ക് ബൈക്ക് battery പണ്ട്രണ്ടു വോള്‍ട്ട് dc ഇല്‍ നിന്ന് led 1amps 2nos കത്തിക്കാന്‍ ഉള്ള circuit കിട്ടയാല്‍ വളെരെ ഉപകാരം ആയിരുന്നു

അനില്‍@ബ്ലൊഗ് said...

roseadens,
ഉദ്ദേശിച്ചത് എന്താണെന്ന് മനസ്സിലായില്ല.

ഗ്രീഷ്മയുടെ ലോകം said...

roseadens,

ഇലക്ട്രോണിക് സർക്യുട്ട് ചെയ്ത് നല്ല പരിചയമുണ്ടെങ്കിൽ മാത്രമേ സ്വയം ചെയ്യാൻ കഴിയൂ. സർക്ക്യുട്ട് വിഷമകരവും ആവശ്യമായ കമ്പോണന്റുകൾ കിട്ടാനും പ്രയാസവുമായിരിക്കും. ഇന്റെർനെറ്റിൽ പരതിയാൽ വളരെ അധികം സർക്യൂട്ടുകൾ കാണാം. ഉദാഹരണത്തിനു:
http://dev.emcelettronica.com/cheap-high-current-led-driver

അനില്‍@ബ്ലൊഗ് said...

മണ്‍സാര്‍,
എന്തു ആപ്ലിക്കേഷനാണ് ഉദ്ദേശിക്കുന്നതെന്ന് വ്യക്തമാവട്ടെ എന്നു കരുതി.
ടെയില്‍ ലാമ്പ് അസ്സംബ്ലി ഇപ്പോള്‍ തന്നെ എല്‍.ഇ.ഡി വരുന്നുണ്ടല്ലോ, പക്ഷെ അത് 1 ആമ്പിയര്‍ എടുക്കുന്നില്ലെന്നാണ് എന്റെ ധാരണ.

Mohanam said...

അനില്‍ ഞാന്‍ അവിടുത്തെ കമന്റ് ഡിലീറ്റിയത് മറ്റൊന്നും കൊണ്ടല്ല , അത് ഇവിടെയാണ് നല്ലതെന്നു തോന്നി(എന്താണ് എഴുതിയിരുന്നത് എന്ന് മെയില്‍ കിട്ടിക്കാണുമല്ലോ)

വീണ്ടും എഴുതാനുള്ള സമയം കിട്ടിയതുമില്ല,
പരീക്ഷണങ്ങള്‍ നന്നാവുന്നുണ്ട് ആശംസകള്‍.

എനിക്ക് വീട്ടിലുള്ള ലൈറ്റെല്ലാം എല്‍ ഇ ഡി ആക്കണമെന്നുണ്ട്, അത് (വെളിയിലുള്ളത് ഉള്‍പ്പടെ)പ്രായോഗികമാണോ എന്നറിയണം,

ഈ പോസ്റ്റില്‍ പറഞ്ഞിരിക്കുന്നതല്ലാതെ നല്ല ഡ്രൈവര്‍ സര്‍ക്യൂട്ട് ഡിസൈന്‍ കിട്ടാന്‍ വല്ല വഴിയുമുണ്ടോ ?

ഇതിനുള്ള നല്ല ഫിറ്റിംഗുകള്‍(കേസും മറ്റും) നമ്മുടെ നാട്ടില്‍ ഇപോള്‍ ലഭ്യമാണോ ?
ഹൈ ബ്രൈറ്റ് എല്‍ ഇ ഡികള്‍ക്ക് ഇപ്പോള്‍ എന്ത് വില വരും ?

Mohanam said...

രണ്ടാമത് ഡിസിക്കായി മറ്റൊരു വയറിംഗ് പ്രായോഗികമാണെന്ന് തോന്നുന്നില്ല, കാരണം അങ്ങനെയൊരു വയറിംഗ് വീണ്ടും നടത്തിയാല്‍/ഇനി ഓപ്പണ്‍ വയറിംഗ് മാത്രമേ നടക്കൂ (കേസ് & ക്യാപ്പ്), എല്ലാ മുറിയിലും ഒന്നുകൂടി വയറിംഗ് ചെയ്താല്‍ ചിലവ് വളരെ കൂടും, അപ്പോള്‍ ഓരോന്നും സ്വതന്ത്ര യൂണിറ്റാക്കുന്നതായിരിക്കും നന്ന്/ നമ്മളുടെ അസാന്നിദ്ധ്യത്തില്‍ പോലും റീപ്ലേസിനോ/റിപയറിംഗിനോ ഓക്കെ